Kupu IV: ‘Ulungāanga Fetu‘utaki sino ‘a e Tangata mo e Fefine

Kupu IV: ‘Ulungāanga Fetu‘utaki sino ‘a e Tangata mo e Fefine

‘Oku tau lau ‘a e ‘ulungāanga fetu‘utaki sino ‘a e tangatá mo e fefiné ko e me‘a‘ofa lelei ‘a e ‘Otuá, ke fakatupulekina ‘a e nofo fe‘ofo‘ofani ‘a e ongo me‘a malí. ‘Oku tau faka‘amu ki he toko taha kotoa pē ke ne mapule‘i ‘a hono ngaahi ‘ulungāanga kotoa pē kae ‘oua leva kuo hokosia ‘a hono taimi totonú ke fakahoko ai ‘i he nofo malí. Neongo ko e ongo‘i ‘o e me‘a‘ofa ko ení ‘oku ma‘u ia ‘e he toko taha kotoa pē ‘o tatau ai pē pe kuo mali pe te‘eki mali, ka ‘oku tau fakapapau ko e ‘ulungāanga fetu‘utaki fakasino ‘a e tangatá mo e fefiné ke toki fakahoko pe ia ‘i he taimi kuo na fakahoko ai ‘a e nofo mali fakalaó. Pea ‘oku fakapapau‘i ai pē ‘a e ‘ikai ke tali ‘e he Siasí ‘a e nofo fe‘auakí.

‘Oku ‘ikai ke tali ‘e he Siasí ‘a hono ngāue‘aki fakakōmesiale ‘a e sino ‘o e tangatá pe ko e fefiné ‘a ia ‘oku holoki ai ‘a e ngeia ‘o e tangata mo e fefine taki taha. Ko ia ai ‘oku fie ma‘u ke ako‘i ‘a e fānaú, to‘utupú mo e kakai lalahí felāve‘i mo e ngaahi ‘ulungāanga ‘oku fekau‘aki mo e me‘a‘ofa ‘a e ‘Otuá ‘o kau ki he ‘ulungāanga totonu ki he fetu‘utaki fakasino ‘a e tangatá mo e fefiné.

‘Oku ‘ikai foki ke tali ‘e he Siasí ‘a e ‘ulungāanga fetu‘utaki fakasino ‘a e tangata mo e tangata pea mo e fefine mo e fefine he ‘oku fepaki ia mo e akonaki faka-Kalisitiané pea mo e akonaki ‘a e Tohi Tapú pea ko e angahala ia ‘oku ne fakatupu ‘a e ngaahi mahaki fakatu‘utamaki hangē ko e ‘Eitisí. Ko ia ai ‘oku totonu ke tokanga ‘a e Siasí ke akonaki‘i mo fakatokanga‘i ‘a hono kau mēmipá ke nau faka‘ehi‘ehi pea ta‘ofi ‘aupito ‘a e fa‘ahinga ‘ulungāanga ko ení.