Siope 15
‘Oku tau maheni mo e talanoa ‘o Siopé ko e tangata angatonu mo fai tōnunga, he ko e tangata ‘apasia ‘Otua mo afe mei he koví. Kae hoko ‘a e fuʻu faingataʻa naʻe feʻao mai mo Siopé ke ne sivisiviʻi ai ‘ene angatonú mo ‘ene fai tōnungá.
Ko e tangata monūʻia he naʻe mohu tāpuekina. Ko e tangata naʻe koloaʻia, pea naʻe hangē ‘ene fānaú ha huliʻi ʻōlive takatakai ‘i hono lotofalé. Naʻe ‘i ai ‘ene kau ngāue, pea naʻe maʻu kelekele lahi ‘a Siope ‘o tauhi ai ‘ene fanga monumanú. Pea naʻe ‘ikai ha taha ‘i he fonuá naʻe kākunga ki he fai tōnunga ‘a Siopé.
Ka naʻe liliu kotoa ‘a e ngaahi meʻá ni ‘i he taimi naʻe ala ai ‘a sētane ke ‘ahiʻahiʻi ‘a e fai tōnunga ‘a Siopé. Naʻe toʻo kotoa ‘a e koloa ‘a Siopé meiate ia, pea pekia mo ‘ene fānaú, pea kuo toka eni ‘a Siope mo e fuʻu faingataʻa lahi. Ko e kotoa ‘a e ngaahi meʻá ni naʻe vave ‘aupito ‘ene hoko kia Siopé pea ko siʻene nofó ni, ko e feʻaʻao pē mo e ngaahi hangatāmaki ‘oku hulu atu fau ke kātakiʻi ‘e ha taha.
Ka kia Siope, “ko Sihova na‘a ne foakí, pea ko Sihova kuo ne to‘o atú; kae mālō‘ia ai pē ‘a e huafa ‘o Sihová.” Naʻe lea ‘a e uaifi ‘o Siopé kia Siopé, “…tafuli muʻa [koe] mei he ‘Otuá pea mate.” Kae tali ‘e Siope, “te tau tali koaá ‘a e lelei mei he ‘Otuá, kae ‘ikai tali mo e koví?” Neongo ‘a e faingataʻá naʻe kei tauhi pē ‘e Siope ke fai tōnunga ‘i he meʻa kotoa pē.
Naʻe haʻu ‘a e ngaahi kaumeʻa ‘o Siopé ke vakai ‘a Siope. Ko ‘Elifasi, mo Pilitati, mo Sofaʻa. Naʻa nau momou ke foaki ha foʻi lea, heʻenau mamata kiate iá, he naʻa nau mātuʻaki ongoʻi ʻaupito ‘a e mafatukituki ‘o e faingataʻaʻia ‘a Siopé.
Naʻa nau fanongo tonu ‘i he toʻe mo tangilaulau ‘a Siopé pea naʻa nau lea lahi kiate ia, koeʻuhí (tokua) ko ha hia ‘omi mala ‘oku fiemaʻu ke vete ki he ‘Otuá. Naʻa nau nofo ai ‘o fakakolekole ‘a Siope ke ne vete ‘ene angahalá ki he ‘Otuá pea fakatomala mei ai. Kae kei piki pē ‘a Siope ki heʻene fai tōnungá.
Ko e vahe 15, ko hono tuʻo ua ia ‘a e fakatalanoa ne fai ‘e ‘Elifasi kia Siopé, pea hangē ‘oku kiʻi fefeka ‘ene tukuakiʻi ko e faingataʻaʻia ‘a Siopé koeʻuhí ko ha hia naʻa ne fai, pea ‘oku teʻeki ke ne vete mo fakatomala mei ai. Ka ko hono moʻoní ko e meʻa pē ia ne nau maheni mo iá, he ‘ilonga ha taha naʻe moʻua ha faingataʻa lahi, naʻe lau ia ko e tautea ‘o ha hia fakamalaʻia naʻa ne fai.
Ko e mālié, neongo ‘a e faingataʻaʻia ‘a Siopé, naʻe lahi ange ‘ene mamahi koeʻuhí ko e ‘ikai fai ‘e hono ngaahi kaumeʻá ha lea fakalelu kiate iá. Ko ‘enau ngaahi tukuakí naʻe ‘ikai moʻoni, pea fakamamahi lahi. Ko e tali ‘a Siopé, “…‘oku ou ‘ilo ‘oku moʻui ‘a hoku Koelí, pea te ne tuʻu mai ki he funga efu kimuí; Pea hili hoku kilí hono ‘aunga peheé, ka ko ia ai pē ha kakano te u mamata kia ‘Elohā.”
Kāinga, ‘oua te ke mahalo ‘oku puli hoʻo fai tōnungá mei he ‘Otuá. Tauhi ho vā mo e ‘Otuá ke moʻui, mo maʻa. Pea neongo, pe ‘oku lahi fēfē ha faingataʻa ‘oku ke fekuki mo ia, pea hangē nai kuo liʻaki kita ‘e he ‘Otuá, tauhi hoʻo fai tōnungá—ko e fai tōnunga ki he ‘Otua. ‘I he meʻa kotoa pē, fai tōnunga pē koe, kehe pē mahino ko e ngāue ‘oku tau faí ‘oku lāngilangiʻia mo tuʻukimuʻa ai ‘a e ‘Otuá.
