MŌNITE 02
Kaveinga Lotu Pongipongi: Tau kamata mo e ʻEikí ʻi he Vīsone ʻa e Siasí ke tau hākeakiʻi ʻa e ʻOtuá ko e tuʻukimuʻa ‘i heʻetau meʻa kotoa pē. (Himi 234, 365, 401)
Fakafetaʻi: Tau Fakafetaʻi ki he ʻEikí, ʻi he ‘Ene tuku ke tau ikuna ʻa e taʻu kuo ʻalu na, pea fakatūʻuta moʻui kitautolu ki he taʻu foʻoú ni.
Hūfia: Tau Tukupā ke tau kamata mo e ʻEikí ʻi he taʻu foʻoú ni, ʻo tau hākeakiʻi ʻa e ʻOtuá ko e tuʻukimuʻa ʻi he ʻetau meʻa kotoa pē, pea tau ʻinasi ai ʻi he māʻoniʻoni ʻaʻaná ‘i he ʻEne ngaahi Talaʻofá mo e Kovinānite (Saame 34:8; Mātiu 6:33).
Kaveinga Lotu Efiafi: Tau kamata ʻi he Vīsone ʻa e Siasí ke fakaivia kitautolu ʻe he Laumālie Māʻoniʻoní pea ke tau fakatomala mo fakafoʻou ai. (Himi: 232, 447, 518)
Fakafetaʻi: Tau Fakafetaʻi ki he ʻEikí ʻi he kamataʻanga ʻo e taʻu ko eni, mo e vīsone ke fakaivia kitautolu ʻe he Laumālie Māʻoniʻoní ke tau lava ʻo fakahaaʻi hono ivi fakamoʻuí ʻi he lotu, ako mo e ngaahi ngāue tokoni kotoa pē ʻa e Siasí.
Hūfia: Tau tukupā ke tau fakatōmala moʻoni pea tau kamata mo e Talaʻofa ʻo e Fakatupu Foʻoú ka tau maʻu ai ʻa e moʻuí ki he ʻene lahi ʻaupitó. (Ngāue 1:8, Luke 15:18).
TŪSITE 03
Kaveinga Lotu Pongipongi: Misiona ʻa e Siasí ki he ʻUlu e Fonuá he taʻau feliuliuaki ʻo e Senituli 21. (Himi 234, 391, 390)
Fakafetaʻi: Tau Fakafetaʻi ʻi he fakalakoifie lelei ʻa ʻEna ʻAfifió, Tupou VI mo Kuini Nanasipauʻu; pea fakafetaʻi ʻoku hao pea malu pē ‘a e fale ʻo Haʻa Moheofo; Pilinisesi Salote Mafileʻo Pilolevu Tuita, Pilinisi Tupoutoʻa ‘Ulukalala, pea ‘oku kei fakalaumālie lelei pē ʻa e fale ʻo Houʻeiki mo e kau tauhi fonuá. Fakafetaʻi, he ʻoku kei vilingia ʻa e fuká mo e kolosí ke fakamahino ko e “ʻOtua mo Tonga ko hoku tofiʻa.”
Hūfia: Tau hūfia ke tau hākeakiʻi ʻa e ʻOtuá ko e tuʻukimuʻa ʻi he ʻetau meʻa kotoa pē, pea ke kei fakaivia kinautolu ʻe he Laumālie Māʻoniʻoní ke lakalakai monū ʻa ʻenau pulé mo hono pukepuke ʻo e melinó mo e fakamaau totonú ʻi he fonuá, he taʻau feliuliuaki ʻo e Senituli 21. (Saame 72:1-2, 7; Luke 20:22, 25).
Kaveinga Lotu Efiafi: Misiona ʻa e Siasí ki he kau Taki ‘o e Fonuá he taʻau feliuliuaki ʻo e Senituli 21. (Himi 232, 657, 449)
Fakafetaʻi: Tau Fakafetaʻi ʻi he fakalaumālie lelei e Houʻeiki Taki ʻo e fonuá, pea tau tūʻuta moʻui ai ki he taʻu foʻou ko eni. Fakafetaʻi, ʻoku laumālie lelei pē ʻa e ʻEiki Pālēmiá, Houʻeiki Kapinetí mo e kau taki ʻo e Puleʻangá, Seá mo e Houʻeiki Fale Aleá, pea pehē ki he Tuʻi Fakamaau Lahí, Fakamaauʻangá mo e Houʻeiki Fakataha Tokoní.
Hūfia: Tau hūfia ai pē ke nau hākeakiʻi ʻa e ʻOtuá ko e tuʻukimuʻa ʻi he ʻenau meʻa kotoa pē, pea ke fakaivia kinautolu ʻe he Laumālie Māʻoniʻoní ki hono tataki faka-Konisitutone ʻo e kakai ‘o e fonuá ke maʻu ʻa e fakamaau totonú mo e ngaahi taumuʻa fakalakalaka ʻa e fonuá (2015- 2025) ʻi he taʻau feliuliuaki ʻo e senituli 21. (ʻEikisoto 18:25, Loma 13:1, 5, 14).
PULELULU 04
Kaveinga Lotu Pongipongi: Ko e Misiona ʻa e Siasí ke longomoʻui ʻa e ngaahi ouau lotú pea fenāpasi mo e tūkunga kehekehe ʻo e ʻahó, kae kei fakahaaʻi ‘a e tui totonu. (Himi 234, 114, 15)
Fakafetaʻi: Tau fakafetaʻi he laumālie lelei e ngaahi fāmili ʻo e Siasí pea tau tūʻuta moʻui ai ki he taʻu foʻou ko eni. Tau fakafetaʻi he Talaʻofa ʻo e Fakatupu Foʻoú ke ʻinasi ai e ngaahi fāmili ʻo e Siasí pea ke hōhoamalie mo e tūkunga ʻo e ʻahó.
Hūfia: Tau Hūfia ʻa e Laumālie Māʻoniʻoní ke fakaivia e ngaahi fāmili ʻo e Siasí ke to e longomoʻui mo Fanauʻi Foʻou ʻa e ngaahi ouau lotú ʻi hono founga mo e taimi ʻoku fakahoko aí, pea taimi tatau ke kei fakahaaʻi totonu pē ʻa e Tuí, ngaahi Akonakí mo e ngāue fakalaumālie ʻa e Siasí. (Saame 100:2-4; Loma 12:2).
Kaveinga Lotu Efiafi: Ko e Misiona ʻa e Siasí ke fakaʻatā e fale ʻo e Siasí ki he taha kotoa pē, ke lava ʻo fai honau tanumakí ke nau aʻusia ʻa e moʻui faka-ʻOtuá mo e tuʻunga Lotu Fehuʻi. (Himi: 234, 546, 619)
Fakafetaʻi: Tau fakafetaʻi ʻi he tūʻuta mātuʻu ʻa e folau e vaka ʻo e Siasí ki he taʻu foʻou ko ‘ení, ko e ʻamanaki ʻanga ki he taha kotoa pē, ke ne aʻusia ʻa e Talaʻofa ʻo e Fakatupu foʻoú. Tau fakafetaʻi ko e Tangataʻeiki Palesitení, Sekelitali Lahí, ʻUlu ‘o e Ngaahi Potungāué, ngaahi vahenga ngāué, Kau Faifekaú, kau Malangá, kau Faiako, kau Ako Tapu, Tauhi ʻaho, Taki Toʻutupu, Failautohi faka-Sāpate, mo e kau Ngāue kotoa pē ʻo e Siasí.
Hūfia: Tau hūfia ke nau hākeakiʻi ʻa e ʻOtuá pea fakaivia kinautolu ʻe he Laumālie Māʻoniʻoní ki hono Fakatupu foʻou ʻo e Siasí; ʻI he ngaahi Tēniti Fakafāmilí, Kalasi ʻAho Lotu Fehuʻi, Akolotu Lautohi Faka-Sapate mo e ngaahi akoʻangá, ke tanumaki ʻa e tui totonú pea aʻusia ʻa e moʻui faka-ʻOtuá mo e Lotu Fehuʻí he ʻetau teuteu atu ki he Senituli 2 ʻo e lotu he 2026. (Saame 27:4; Kolose 2:6-7)
TUʻAPULELULU 05
Kaveinga Lotu Pongipongi: Ko e Misiona ʻa e Siasí ke fakataulama ki he moʻui lelei mo e ngeia ʻo e tangatá mo e fefine, mo e malu ʻo e fonuá mo e ʻātakai, ‘o tatau ‘i Tonga mo māmani. (Himi: 232, 529, 533)
Fakafetaʻi: Tau fakafetaʻi ʻi he ʻetau tūʻuta moʻui ki he taʻu foʻoú ni, neongo e ngaahi faingataʻa ʻo e Covid-19 mo e pā ʻa e moʻunga afí, pea tau fakafetaʻi foki he ngaahi tokoni kotoa pē fakalotofonua mo fakatuʻapuleʻanga ki hono fakaakeake ʻo e fonuá mo e Siasí mo e ngaahi fāmilí.
Hūfia: Tau hūfia ki he ʻOtuá ke fakahaofi ʻa Tonga mei he ngaahi mahaki fakaʻauhá pea fakahaofi ‘a e ngaahi fāmilí mo e toʻutupú mei hono uesia ‘e he faitoʻo konatapú, mo e kavamālohí, mo e tekinolosiá, mitia fakasōsialé, pea pehē ki he ngaahi faingataʻa fakaēnatulá, kaeʻumaʻā e feliuliuaki ʻo e ʻeá mo e hikihiki ʻa e ngaahi totongi koloá mo e loló. (Senesi 1:28, Palovepi 11:3)
Kaveinga Lotu Efiafi: Ko e Misiona ʻa e Siasí ke fakataulama ki he melino ʻa e nofó mo e maʻumaʻuluta ʻa e ngaahi tukufakaholo fakaloto fonua mo fakamāmani lahí. (Himi: 234, 621, 391)
Fakafetaʻi: Tau fakafetaʻi ʻi he ʻetau tūʻuta moʻui ki he taʻu foʻoú ni ʻoku kei fongofonga ola pea tuʻutai ʻa e ngaahi tuʻunga kotoa pē ʻi he lotú mo e fonua, fakaloto fonua mo fakamamani lahi. Tau fakafetaʻi he Tō ʻa e ʻOfa ʻi ʻUtuí, Tukufonua ʻi Pouonó, Foaki e Tauʻatāiná mo e Konisitutone, Hā e Kolosi faka-Misiteli ʻi Pulelaʻā, fokotuʻu e Puleʻanga faka-Tuʻí, faka-Konisitūtone mo e Fale Alea ʻoku fili faka-Temokalati hono Palēmia mo honau tokolahi.
Hūfia: Tau hūfia e fonuá mo e lotú ke fakaʻapaʻapaʻi ʻa e pule leleí mo e taki fakasevānití ʻi he tapa kotoa pē ʻo e nofó ‘i he Puleʻangá, ngaahi ngāueʻangá, Siasi mo e ngaahi fāmilí; ke taliui mo ʻata ki tuʻa, pea ke vahevahe taau mo tauhi ʻa e laó ʻi he taimi kotoa pē, fakalotofonua mo fakamāmani lahi. (ʻAisea 32:17, Matiu 5:9)
FALAITE 06
Kaveinga Lotu Pongipongi: Ko e Misiona ʻa e Siasí ki he taʻu faka-Konifelenisi ko ení (2022-2023) ke tau tali ʻa e Talaʻofa mo e Kovinānite ko e halanga folau ki he monūʻiá. (Himi: 232, 455, 622)
Fakafetaʻi: Tau fakafetaʻi ʻi he ʻetau tūʻuta lelei ki he taʻu foʻou ni, ʻoku tau ʻinasi ʻi he Talaʻofa mo e Kovinānite ʻa e ʻOtua ko hotau moʻuiʻanga mo hotau ʻamanaki ʻanga.
Hūfia: Tau tukupā ke tau talangofua mo tui pikitai ki he Talaʻofá mo e Kovinānité ka tau maʻu ʻa e moʻuí ki he ʻene lahi ʻaupitó ʻo iku ki he moʻui taʻengatá. (Selemaia 31:33; Sione 3:16).
Kaveinga Lotu Efiafi: Ko e Misiona ʻa e Siasí ki he taʻu faka-Konifelenisi ko ení (2022-2023) ke tau ngāueʻi mo moʻuiʻaki ʻa e Talaʻofá mo e Kovinānité ke langilangiʻia ai pē ʻa e ʻOtuá. (Himi 234, 497, 663)
Fakafetaʻi: Tau fakafetaʻi ʻi he ʻetau ikuna ʻa e Uike Tōtaʻu fakalaumālie ʻo e taʻu foʻoú ni. Fakafetaʻi ko e Talaʻofa mo e Kovinānite ko ia naʻe ʻi he kamataʻangá kuo fokotuʻu ai hono tāpanekalé ʻi hotau lotolotongá pea te ne ʻiate kitautolu ʻo aʻu ki he ngataʻanga ʻo māmaní.
Hūfia: Tau tukupā leva ke fakafoʻou, pea toe fakapapauʻi ʻetau tuí ke hā sino ‘i he ʻetau ngāué mo ʻetau fakafeangai kotoa pē ʻa e Talaʻofá mo e Kovinānité; ʻa ʻEne pekiá mo ʻEne toetuʻú, ʻa ʻEne hāʻele hake ki he langí, mo e hifo ʻa e Laumālie Māʻoniʻoní mo ʻetau teuteu atu ki he toe hāʻele mai ʻa e ʻEikí ʻi hono langilangí. (Teutalonome 6:4-5; Luke 10:27)
