Pōpoaki Talamonū
Taʻu ‘e 100 ‘o Faifekau Howard Secomb (Hauati Sēkomi)
& Taʻu ‘e 97 ‘o Janet Secomb (Sēneti Sēkomi)
Naʻe fanauʻi ‘a Hauati Sēkomi ‘i Warracknabeal ‘i Vikatōlia, ‘Aositelēlia, ‘i he taʻu 1922. Ko hono tolu ia e toʻutangata ‘i he fāmilí ne tukufakaholo ai e lakanga faifekaú. Ko ‘ene tangataʻeikí ko Faifekau Toketā Herbert Secomb, ‘aia naʻe hoko ko e Palesiteni Lahi ‘o e Siasi Metotisí mei he 1948 ki he 1951, pea naʻa ne ‘aʻahi mai ai ki Tonga.
Naʻe ako ‘a Hauati Sēkomi ‘i he ‘Univēsiti ‘o Melipoané ‘i he 1940, kae motuhia siʻene akó tuʻunga ‘i he tau naʻe fai ‘i he Taulanga Mataʻitofé (Pearl Harbor), he naʻe pau ai kia Hauati ke hū ki he ‘Apitanga Tau ko Bonegilla Army Camp. Naʻe ‘ilo ‘e he Faifekau ‘o e ‘Apitanga Taú naʻe teuʻi ‘a Hauati ia ki he ngāūe fakamisinale ‘a e Siasi Metotisí, pea naʻa ne fekau ai pē ‘a Hauati ke foki ki he ui ko iá he ‘oku mahulu ange hono mahuʻingá. Naʻe hilifakinima ‘a Hauati ki he lakanga Faifekau Hokó ‘i he taʻu 1948.
Naʻa ne maʻu hoa kia Sēneti Uti (Janet Wood) ‘i he taʻu 1949. Ko Sēnetí ko e ‘ōfefine ia ‘o Dr A. Harrold Wood mo Dr Olive Wood. Naʻe pole ai pē ‘a Hauati mo Sēneti ki he ngāue fakamisinale ki mulí. Pea naʻa na ‘amanaki ke ngāue ki ‘Initia, kae kole e faʻē ‘a Sēnetí kia Hauati ke kau mo Tonga ‘i heʻena palaní. Ko e taimi eni naʻe fiemaʻu ai ha Faifekau Sea ki Vavaʻu. Ko ia, naʻe hoko atu e ako ‘a Hauatí ‘o maʻu e fakaʻilonga fakaako ‘i he Ako mo Faiakó kimuʻa pea na tūʻuta ʻi Tonga ‘i he taʻu 1950, fakataha mo hona foha ko Kōtoni (Gordon), ‘o nau nofo ‘i Vavaʻu. Naʻa nau hiki mei ai ki he Kolisi ko Tupoú ‘i Siune 1951, ‘o hoko ai ‘a Hauati Sēkomi ko e tangataʻeiki Puleako ‘o e Kolisi ko Tupoú mo Sēneti ko e faiako ‘i he lēsoni lea fakaPilitāniá mo e Mūsiká. Ko Hauati Sēkomí ko e Puleako fuoloa taha ia ‘a e Kolisí (tukukehe ‘a Dr Molitoni). Naʻa ne Puleako ‘i he Kolisi ko Tupou mei he 1951 ki he 1963. Naʻe toe hoko pē ‘a Hauati Sēkomi ko e Palesiteni ‘a e Siasí mei he ta’u 1961 ki he 1963, lolotonga ia ‘ene ngāue ko e Puleako ‘i he Kolisi ko Tupoú.
‘Oku kau fakataha ‘a e Siasi Uesiliana Tauʻatāina ‘o Tongá mo Tonga kotoa, Kolisi ko Tupoú mo e kautaha Ako Tutukú ‘i he fakafetaʻi ki he ‘Eikí koeʻuhí ko e hokosia ‘e Hauati Sēkomi hono taʻu 100 he ‘ahó ni, Pulelulu 20 Siulai 2022, pea mo Sēneti Sēkomi hono taʻu 97 ‘apongipongi. ‘Oku mau talamonū atu, tauange ke tafe atu ai pē e tāpuakí mo e lelei ‘a e ‘Eikí kiate koe Faifekau Hauati mo Sēneti Sēkomi, pea ke lakalakaimonū ai pē hoʻomo moʻuí ‘i he ‘ahó ni pea fai atu ‘o taʻengata. 'Ofa atu.
