Laumalie Maʻoniʻoni Fakafoʻou ʻEtau Fānaú
“Pea ʻi heʻene lea pehē, naʻa ne hō kiate kinatolu, ʻo ne folofola, Mou maʻu Laumālie Māʻoniʻoni ā” Sione 20:22
Ko e kaveinga ‘o e taʻu faka-konifelenisí, ko e lotu ʻa e kakai ʻo e Siasí. Pea ko e kupuʻi lotu taaumaʻu ia fakaʻaho ‘oku tau fai lolotonga ‘a e taʻu faka-konifelenisi 2019/2020, ‘oku fakalea: “Laumālie Māʻoniʻoni Fakafoʻou ʻEtau Fānaú ”.
Ko e Laumālie Māʻonioní ʻoku ne fai ʻa e fakafoʻou ʻetau fānaú ka ʻoku ʻikai ko kitautolu. Pea ko kitautolu ʻa e kakai ‘o e Siasí ‘oku meʻangāueʻaki ʻe he Laumālie Māʻoniʻoní ki he fakafoʻou ʻetau fānaú ʻi he ngaahi founga kehekehe naʻe ʻoatu ʻi he ʻOtu ʻo ʻAokosí. Pea ʻoku taau ke tau tomuʻa maʻu Laumālie Māʻoniʻoni kitautolu ke faiʻaki hotau fatongia ki he fānau pea toki fou atu ʻiate kitautolu ʻa e ngāue ʻa e Laumālie Māʻoniʻoni ki heʻetau fānaú. ‘Oku ʻikai ko ʻetau lotú ke hifo hangatonu ʻa e Laumālie Māʻoni’oni ki heʻetau fānaú. Kae ʻikai kiate kitautolu. Ka ke tau tomuʻa maʻu Laumālie Māʻoniʻoni ʻa e ngaahi Tamai mo e Faʻē, kau Faifekaú, kau Setuatá, kau Malangá, kau Akonakí, kau Faiakó, kau Failautohi Faka-Sapaté, kau Taki Akolotú, kau Tauhi ʻAhó mo e ngaahi lakanga tauhi kakai ‘o e lotú ʻi he Siasí.
Ko e Laumālie Māʻoniʻoní ko e mānava moʻui pe ko e hō mai ʻe he ʻOtuá hono ivi fakamoʻuí ki he faʻahinga ‘o e tangatá. ‘Oku fokotuʻu atu ʻe he ʻOtu ni ʻa e Himi 662 ke fakaloloto ʻʻaki etau lotu ki he Laumālie Māʻoniʻoní ke ne fakafoʻou ʻetau fānau. Ko e veesi 1: “Hō mai ʻa e ʻAfio na. Pe au moʻui ai. Ke fonu ʻofa hoku loto. Ko hoʻo fekau ke fai”. ‘Oku mānava moʻui ‘a e sino ʻo e tangatá mo e fefiné he hō pe angi mai ʻa e matangi pe ʻea fakamatelie. Ko e mānava moʻui mai ki he loto ‘o e kakaí pea fonu ʻofa ke fai ʻa e fakafoʻou ‘o ʻetau fānau he hō pe angi mai ki ai ‘a e Laumālie Māʻoniʻoní.
Ko e veesi 2: “ Hō mai ʻa e ʻAfiona. Ko au pe te u liʻoa. Ke fai ho finangalo pe. Hoʻo ʻū fekau katoa”. Ko e liʻoa ko e foaki kakato ʻa e ivi, taimi,ʻatamai, loto mo e laumālie ke fai ʻa e finangalo ʻo e ʻOtuá. Ko e folofola a Sisū ki he Kau Ako ʻi he Kosipeli ʻa Sione vahe 4: 34. Ko ʻEne meʻakai ko e tuli ke fai ʻa e finangalo ʻo e ʻOtua ke fai ʻa ʻEne fekau ke ʻosi. Ko ʻetau maʻuʻanga ivi fakaʻaho ki he fai ‘o e fakafoʻou ʻetau fānaú ko e tuli ke fai ʻa e finangalo ʻo e ʻOtuá.
Ko e veesi 3: “ Hō mai ʻa e ʻAfiona. Ha laumālie foʻou. Ke hoko hoku loto ni. He vaka pe ʻoʻou: Ko e lao ʻo natula ‘oku ne tuʻutuʻuni ko ʻetau moʻui he manava moʻui fakamatelie, ko ʻetau manava ki loto (breath in) ki he sino ʻa e ʻea foʻou (oxygen) ʻoku haʻu mei he ʻakau moʻui. Ka tau manava ki tuʻa ‘a e penuʻi ʻea (Carbon dioxide) ke foki pe ki he ʻakau ke toe fakafoʻou mei ai. Ko e faʻunga ‘o e moʻui fakalaumalie ʻa ha tangata pe fefine ko e ho mai ʻe he ʻOtua ‘a e moʻui foʻou ki hotau loto mo e laumalie pea tau manava ʻaki ki tuʻa ki heʻetau fanau ʻi he ngaue ‘oku tau fai kiate kinautolu ken au maʻu ivi mo e moʻui foʻou ke nau moʻui ai.
Ko e veesi 4: “ Hō mai ʻa e ʻAfiona. ʻE ʻikai te u pekia. Moʻui aipe ʻia Koe. Mo hoʻo fuʻu fiefia”: Naʻe folofola ʻa e ʻEiki toetuʻu ki heʻene Kau Ako pea hō kiate kinautolu ke nau maʻu Laumālie Māʻoniʻoni ā”. Ko ʻetau maʻu ʻa e Laumālie Māʻoniʻoni ki he fakafoʻou ʻetau fānaú, ʻe ʻikai te tau pekia taʻengata ai hotau laumālie fakataha mo ʻetau fānaú. Ka te tau moʻui fakataha mo e ʻEiki toetuʻú ʻi he fiefia ‘o e moʻui taʻengatá.
Ke hoko ʻa e Himi 662 ko e Himi ia ʻetau kaveinga fakafoʻou ʻetau fānau ʻe he Laumālie Māʻoniʻoní. ʻOku ʻikai ko e fakafoʻou pē e moʻui ʻi taimi. Ka ko e fakafoʻou ke tau toe moʻui fakataha mo ʻetau fānaú he moʻui ʻo ‘Itanití.
