Laumālie Māʻoniʻoni Fakafoʻou ʻEtau Fānaú
Maʻake 10: 14&15 “ Ka ‘i he mamata ki ai ‘a Sīsū, naʻa ne tuputāmaki. ‘O ne pehē kiate kinautolu. Tuku pē ‘a e kau tamaikí ke nau haʻu kiate au. ‘Oua ‘e taʻofi ‘a kinautolu; He ‘oku maʻa e faʻahinga ko iá, ‘a e puleʻanga ‘o e ‘Otuá. Ko au ē, ‘oku ou talaatu, Ko ia ‘e ‘ikai te ne tali ‘a e puleʻanga ‘o e ‘Otua, ‘o hangē ko ha tamasiʻi, ‘e ‘ikai ‘aupito hū ia ki ai. ”
‘Oku ‘i ai ‘a e ongo ivi malohi faka-natula ‘e ua ‘oku ne ue’i ha meʻa ke ngāue, ko e ivi teke’i atu mo e ivi tohoaki mai (push and pull). ’Oku ʻikai malava ki he ongo ivi malohi ko ení ke na feteketekeʻi pea to e fetohoaki ‘i he taimi tatau. Kapau ‘e hanga ʻe he ivi ko ení ‘o tekeʻi atu pea to e tohoaki mai he taimi tatau, pe tohoaki mai pea to e tekeʻi atu he taimi tatau, pea ‘oku na fu’u faikehekehe ‘aupito ‘ena ngāué, pea ‘e faifai pe ‘o hoko ai ha maumau lahi pea fakatu’utamaki. ‘Oku ‘i ai ‘a e fakatātā mahino ‘o e ongo ivi ko ení mo ‘ena ngāue ‘i he lau ‘a e Kosipeli ʻa Maʻaké ki he meʻa naʻe fai ʻe he Kau Ako ʻa Sīsū mo Sīsū ki he fānaú.
‘Oku ʻi ai ‘a e tukuhua ‘oku pehē ka ʻi ai ha taha lelei pea ongoongoa he lava meʻá ‘oku tau fetohoaki ‘a e toko taha ko ia ‘oku tau kau mo iá ko hotau famili pē kaumeʻa koeʻuhí ke tau kau ʻi heʻene ongoongoá. Kapau ko ha toko taha kovi ‘oku tau fetekeaki ‘a e toko taha ko iá ‘oku ʻikai haʻatau felaveʻi mo ia koeʻuhí ‘oku tau mā ʻi he toko taha ko iá.
Ko e ‘Otuá ‘oku ʻikai ke fetekeaki mo fetohoaki ʻene tokanga mai ki he faʻahinga ‘o e tangatá. Kā ‘oku ʻi ai ‘a e ngaahi talanoa he Tohitapu ‘oku fai ʻuhinga ʻa e tekeʻi atu ha taha ʻe he ‘Otuá. Mo tohoaki mai ha taha kehe ke fakaeʻa ai hono langilangí pe ki he lelei ‘a e toko taha ko iá. Kapau ‘oku ne tekeʻi atu ha taha ki ha meʻa pe ko ha feituʻu kuopau ke ngāue atu ‘a e toko taha ko iá ki he meʻa pē ko e feituʻu ‘oku teke’i ki aí, he ʻoku ʻi ai ‘Ene kaveinga pe finangalo ki ai ‘a e ‘Otuá. Hangē ko hono tekeʻi atu ‘a e Peteliake ko Siopé kia Setane ke ne ʻahiʻahiʻi. Ko e meʻa tatau ki haʻane tohoaki mai ha taha ke ofi mai he ʻikai to e tekeʻi atu he ‘oku ʻi ai hono finangalo ki he toko taha ko iá.
Ko e ivi tohoaki ‘o e ‘Otua ki hono Puleʻangá. Ko e talanoa ia ‘o e Koispeli ʻa Maʻaké he ʻaho ni: Ko hono ʻomai ‘a e fānau kia Sīsū pea feinga ‘a e kau Akó ke tekeʻi atu kinautolu ki he mamaʻó. Ko e lea ‘oku ngāueʻakí ko e lolomi kinautolu ‘e he kau Akó. Ka e tohoaki mai ʻe Sīsū kiate ia. Pea ko e fakalea ‘o e tohoaki maí: Tuku pē ‘a e kau tamaikí ke nau haʻu kiate au. ‘Oua ‘e taʻofi ‘a kinautolu; ‘Oua ‘e tekeʻi kinautolú. Ko hono tohoaki mai kinautolu. he ‘oku maʻa e faʻahinga ko iá, ‘a e puleʻanga ‘o e ‘Otuá. Ko au ē, ‘oku ou talaatu, Ko ia ‘e ‘ikai te ne tali ‘a e puleʻanga ‘o e ‘Otuá, ‘o hangē ko ha tamasiʻí, ‘e ‘ikai hū ia ki ai ”.
‘Oku ʻikai ko e tohoaki mai pē fānau ki he ʻEikí ka e toe tohoaki kinautolu ki he Puleʻanga ‘o e ʻOtuá. Ke fakaʻatā ai mo ha to e kakai ke nau kau ai. Pea ‘omai mo hono fekau neongo ‘oku ongo ʻIkai (Negative). “Ko ia ‘e ‘ikai te ne tali ‘a e puleʻanga ‘o e ‘Otuá, ‘o hangē ko ha tamasi’í, ‘e ‘ikai hū ia ki ai”. Ko hono faka-ʻio (Positive). “Ko ia te ne tali ‘a e puleʻanga ‘o e ‘Otuá, ‘o hangē ko ha tamasiʻí, ‘e hū ia ki ai”.
‘Oku fiemaʻú ke tau maʻu ‘a e ivi tohoaki ʻo e Laumālie Māʻoniʻoní ke tohoaki mai ʻetau fānaú ʻo ʻoua ʻe lolomi kinautolu hangē ko e fai ʻa e kau Ako ʻa e ‘Eikí. Pea ʻoua naʻa fakatonutonu pē ki he fānau ‘oku tau saiʻia ai. Ka e lolomi ʻa e fānau ʻoku ʻikai te tau saiʻia aí. Kā ki he fānau kotoa pē ʻa e fonuá. He ʻoku lesisita kinautolu honau faʻeleʻi maí ko e tangataʻifonua mo e fefineʻifonua Tonga. Ko e fānau ʻa e Siasí he ʻoku tau fakahū kinautolu ki he memipa he Siasí ʻi honau papitaisó. Pea lava ai ʻetau Fakafoʻou ʻEtau Fānaú mo e Laumālie Māʻoniʻoní.
