Luke 2:52e “Pea naʻe lalaka atu ‘a Sīsū ‘i he poto, mo e lahi ‘o hono sinó, pea mo hono ‘ofeina ‘e he ‘Otuá mo e tangatá.”
Ko hono fakamahuʻingaʻi eni ‘e he fai Kosipeli ko Luké ‘a e tuʻunga tangata ‘o Sīsū mo e anga ʻene tupu hake he vaaʻihala moʻui ‘o e fānaú. Fakataha mo e tuʻunga tangata ‘a hotau ‘Eikí hili hono aloʻi mai ko e Misaiá. Ko Sīsuú ko e ʻAlo ʻo e ʻOtua, pea ko e tangata moʻoni. Naʻe ‘i ai hono ‘atamai ke ʻilo-meʻa, pea ʻi ai hono sino ke tupu fakalakalaka, pea ʻi ai mo hono loto, ke ne ongoʻi ‘a e ‘ofa mai ‘a e ‘Otuá mo e tangatá.
Ko e ngaahi meʻa ni kotoa ‘i he moʻui ‘a hotau ‘Eikí, ‘a hono ʻatamai mo e sino mo e lotó, naʻe pau ke tupu fakalakalaka mei he siʻi, ki he lahi. Mei he vaivai ki he kaukaua, mei he masivesiva ki he teungaʻia, pea mei he anga tangatá ki he anga ‘Otuá.
Kapau ko Sīsū eé 'i heʻene kei tamasiʻí, naʻe lalaka atu ‘i he potó, mo e lahi ‘o hono sinó, mo ‘ofeina ia ‘e he ‘Otuá mo e tangata, hono lotó mo e laumālie. Naʻe kaunga ki ai ‘a Siosifa mo Mele fakataha mo e Laumālie Māʻoniʻoní. Pea fēfē ai siʻetau fānaú? Ko hai te ne fai ʻa e fakalakalaka ko iá? Ko e tali mahinó pē, ‘oku fai 'e heʻetau kaveingá. Ko kitautolu kau tauhi fānau he familí, Siasí, ʻapiakó, koló mo e fonuáʻakiʻaeiviʻoe Laumālie Maʻoniʻoní. Ko e lao ‘o natulá ki ha tupu fakalakalaka ‘o ha meʻa moʻui ‘oku hoko ai ‘a e liliu vavé mo e mālohí. Fakalakalaka mei he siʻí ki he lahi, mei he vaivaí ki he kaukaua, mei he masivesivá ki he koloaʻia, mo e anga tangatá ki he anga-‘Otua.
Ko e meʻa ʻe tolu ke lalaka ai ʻetau fānaú:
(1) Lalaka atu ‘i he poto (‘atamai). Ko e poto ko eni ‘oku lau ki ai ‘a e Tohitapú, ko e ‘apasia ki he ‘Otuá, ko e kamataʻanga ia ‘o e potó mo e afe mei he koví, ko ‘ete maamá ia (Siope 28:28). Ke pehē ʻetau fānaú.
(2) Lalaka atu ki he lahi ‘o e sinó. Ko e sinó ko e meʻa ngāue ia ‘oku fai ʻaki ʻe he fānaú ‘a e finangalo ʻo e ʻEikí. Ko e sinó ko e meʻa-ngāue ia ‘o e tuí. Hangē ko e lau ʻa e ʻIpiseli ʻa Semisi 3:17. “Pehē foki ‘a e tuí. Kapau ‘oku ‘ikai ke ō mo e ngāué, ‘oku mate pē ia ‘i heʻene tuʻu tahá”. Ke peheé ʻetau fānaú.
(3) Lalaka atu ‘i he ʻofeina ‘e he ‘Otuá mo e tangatá. Ko e ‘ofa ‘a e ‘Otuá mo e tangatá, naʻe toka ki he loto mo e laumālie ‘o Sīsū. Naʻa ne ongoʻi ʻa e ʻofa ko iá. Pea ngāue ʻa e ʻofa ko iá ‘i he ʻEne moʻuí pea ko e ʻuhinga ia ‘o e fakalea mahino ‘a e ngaahi Kosipelí kiate IÁ, he ʻEne fekauʻaki mo e kakaí. Naʻe langa hono fatú ‘i he ‘ofá ‘i he ʻEne sio ki ha fuʻu kakaí. Ke pehē ʻetau fānaú.
Tau lotu mo ngāue ke lalaka atu ‘etau fānaú ‘i he poto, mo e lahi ‘o honau sinó, pea mo hono ‘ofeina ‘e he ‘Otuá mo e tangatá.”
