Luke 2:52e “Pea naʻe lalaka atu ‘a Sīsū ‘i he poto, mo e lahi ‘o hono sinó, pea mo hono ‘ofeina ‘e he ‘Otuá mo e tangatá.”

Ko hono fakamahuʻingaʻi eni ‘e he fai Kosipeli ko Luké ‘a e tuʻunga tangata ‘o Sīsū mo e anga ʻene tupu hake he vaaʻihala moʻui ‘o e fānaú. Fakataha mo e tuʻunga tangata ‘a hotau ‘Eikí hili hono aloʻi mai ko e Misaiá. Ko Sīsuú ko e ʻAlo ʻo e ʻOtua, pea ko e tangata moʻoni. Naʻe ‘i ai hono ‘atamai ke ʻilo-meʻa, pea ʻi ai hono sino ke tupu fakalakalaka, pea ʻi ai mo hono loto, ke ne ongoʻi ‘a e ‘ofa mai ‘a e ‘Otuá mo e tangatá.

Ko e ngaahi meʻa ni kotoa ‘i he moʻui ‘a hotau ‘Eikí, ‘a hono ʻatamai mo e sino mo e lotó, naʻe pau ke tupu fakalakalaka mei he siʻi, ki he lahi. Mei he vaivai ki he kaukaua, mei he masivesiva ki he teungaʻia, pea mei he anga tangatá ki he anga ‘Otuá.

LAUMĀLIE MA’ONI’ONI FAKAFO’OU ‘ETAU FANAÚ

“Vakai ko e fānau ko e ʻinasi meia Sihova. Ko e totongi ‘oku ʻomi ko e fua he manavá. Hangē ko e ngaahi ngahau ʻi ha nima ʻo ha toʻa. Pehē ʻete maʻu ʻa e ngaahi foha/ʻofefine kei talavou kitá. Monūʻia ā, ka ko e toʻa. Kuo fonu ai ‘ene hofangahau na. ‘E ‘ikai mā ‘a e faʻahinga ko iá, ‘Oka nau ka alea mo honau ngaahi filí ‘i he matapā”. Saame 127:3- 5.

Ko e Same 127 naʻe faʻu maʻa e kahaʻu ‘o ‘Isilelí ke ‘i ai ha haʻanau fānau ki hono toe langa hake ‘a Selusalemá fakataha mo e kakai ‘Isilelí hili ‘a e Fakahē ki Papiloné. Naʻe hoko ia ki he ngaahi foha hangē ko Nehemaiá, naʻa ne langa e ‘ā ‘o Selusalemá. Ko e Kovana ko Seluipepelí naʻa ne toe langa e Temipalé pea ko ‘Esela ē, naʻa ne hoko ko e Taulaʻeiki Lahi, ke ne tataki e Lotú maʻa kinautolu ne foki mei he nofo Haʻisia (Fakahē) ki Papilone ‘i he 538KM. Langa ‘ā ‘a Nehemaia, Langa Temipale ‘a Seluipepeli pea langa Kovinanite mo langa fakaeloto mo fakalaumālie ‘a ‘Esela.

Ko ʻenau fānau ko e ‘inasi mei a Sihova. “Ko e totongi ‘oku Ne ‘omi ko e fua he manava.” Hangē ko e ngaahi ngahau ‘i he nima ‘o ha toʻa, pehē ‘a e ngaahi foha ‘oku te ma’u kei talavou kita.” Naʻe ʻi ai ‘a e ngaahi faingataʻa naʻa nau fepaki mo ia: Ka naʻa nau “Monūʻia ā ka ko e toʻa ‘oku fonu ai ‘ene hofangahau na: ‘E ‘ikai mā ‘a e fa’ahinga ko iá, ‘oka nau ka alea mo honau ngaahi fili ‘i he matapā.”

Laumālie Maʻoniʻoni Fakafoʻou ʻEtau Fānaú

“Ko e Fānaú ko e ʻinasi meia Sihova. Ko e totongi ʻoku Ne ʻomi ko e fua he manava” Saame 127:3.

Ko e fehuʻi mahuʻinga ke fai ʻe he Siasí: Ko hai ʻoku fānau ʻi he nofo ʻa e sosaieti? Ko e fānau ʻa hai ʻi he sosaieti?. Ko e tala faka-ʻOtuá, ko e fānau ʻa e ʻOtua. Ka ‘oku ʻomai ko e meʻaʻofa ‘a e ʻOtuá ʻi he founga fakanatula ki he manava ʻo ha tangata mo fefine ʻi he nonofo mali maʻoniʻoni ʻa e husepaniti mo e uaifi. Pea ko e kamataʻanga ʻo e nofo mali naʻe tuʻutuʻuni pē ia ki he ʻuluaki tangatá mo e fefiné ʻe he ʻOtuá, ʻi he kamataʻanga ʻo e fakatupu ʻi Heʻene folofolá: “ Ko ia ʻe tukuange ʻe he tangata ‘ene tamai mo ʻene faʻē, kae pikitai ki hono uaifí: pea te na hoko ko e kakano pē taha (Senesi 2:24). Pea ʻoange kiate kinaua ‘o e mafai mo e totonu ki he fānaú ʻi he folofola naʻe pehē: “ …Mo fakatupu mo fakatokolahi mo fakafonu ʻa mamani…(Senesi 1:28).

Ka kuo hoko mai ‘a e founga mo e fakakaukau faka-e-tangata ia ke ʻi ai ‘a e fānau. Pea ‘oku kau fakataha ‘a e Siasi mo e folofola ʻa e ʻEikí ke tali kinautolu he ʻoku maʻae faʻahinga ko iá ‘a e puleʻanga ʻo e ‘Otuá. Ko e meʻa naʻe tokanga ki ai ‘a e ʻEikí, ko e mahuʻinga ‘o e tuʻunga fānau. Naʻe ʻikai tokanga ia pe ko hai naʻa nau ʻomai ʻa fānau, he ko ʻEne folofola ki he Kau Ako ‘i hono taʻofi ʻa e fānau mei he ‘Eiki: “ Tuku pē ʻa e kau tamaiki ke nau haʻu kiate au. ʻOua ʻe taʻofi kinautolu. He ʻoku maʻae faʻahinga ko iá ʻa e puleʻanga ʻo e ʻOtua”( Maʻake 10:14). Ko hai pe ʻoku fānau ko e fānau ʻa e ʻOtua.

Laumālie Māʻoniʻoni Fakafoʻou ʻEtau Fānaú

Maʻake 10: 14&15 “ Ka ‘i he mamata ki ai ‘a Sīsū, naʻa ne tuputāmaki. ‘O ne pehē kiate kinautolu. Tuku pē ‘a e kau tamaikí ke nau haʻu kiate au. ‘Oua ‘e taʻofi ‘a kinautolu; He ‘oku maʻa e faʻahinga ko iá, ‘a e puleʻanga ‘o e ‘Otuá. Ko au ē, ‘oku ou talaatu, Ko ia ‘e ‘ikai te ne tali ‘a e puleʻanga ‘o e ‘Otua, ‘o hangē ko ha tamasiʻi, ‘e ‘ikai ‘aupito hū ia ki ai. ”

‘Oku ‘i ai ‘a e ongo ivi malohi faka-natula ‘e ua ‘oku ne ue’i ha meʻa ke ngāue, ko e ivi teke’i atu mo e ivi tohoaki mai (push and pull). ’Oku ʻikai malava ki he ongo ivi malohi ko ení ke na feteketekeʻi pea to e fetohoaki ‘i he taimi tatau. Kapau ‘e hanga ʻe he ivi ko ení ‘o tekeʻi atu pea to e tohoaki mai he taimi tatau, pe tohoaki mai pea to e tekeʻi atu he taimi tatau, pea ‘oku na fu’u faikehekehe ‘aupito ‘ena ngāué, pea ‘e faifai pe ‘o hoko ai ha maumau lahi pea fakatu’utamaki. ‘Oku ‘i ai ‘a e fakatātā mahino ‘o e ongo ivi ko ení mo ‘ena ngāue ‘i he lau ‘a e Kosipeli ʻa Maʻaké ki he meʻa naʻe fai ʻe he Kau Ako ʻa Sīsū mo Sīsū ki he fānaú.