Kupu VI: Ko e Tokangaekina ‘o e Totonu fakae‘Otua ‘a e Fānau Iikí
Ko e fānaú ko e koloa ‘a ‘enau ngaahi mātu‘á mei he ‘Otuá, pea ‘oku ‘i ai ‘a e totonu ‘a e fānau ko iá ke tokanga‘i, malu‘i, tauhi mo ‘ofa‘i kinautolu ‘e he‘enau mātu‘á. ‘Oku lava ke fakamahino‘i heni ko e tangata mo e fefine kakato kinautolu ‘o fakatatau ki he‘enau ngaahi totonu fakae-‘Otuá pea ke mahino foki ‘oku ‘i ai mo e fatongia ‘o e kakai lalahí mo e sōsaietí kiate kinautolu. Ko ia ‘oku tau poupou ai ‘a e fokotu‘u ‘o e ngaahi ako‘anga ‘a e Siasí mo e ngaahi founga fakalakalaka kotoa pē ‘o e akó ki hono fakalakalaka ‘o e fānaú kenau a‘usia ‘a e tu‘unga tangata mo e fefine kakató. ‘Oku ‘i ai ‘a e totonu ‘a e fānau iiki kotoa pē ki he ako lelei ‘oku taau mo fe‘unga mo e tui faka-Kalisitiané. ‘Oku pehē ‘enau totonu ki he ma‘u ‘a e me‘atokoni, nofo‘anga, vala, mo e ngaahi tokoni kehe kotoa pē ‘oku fe‘unga ke nau ma‘u ai ‘a e mo‘ui leleí mo ‘enau fakalakalaka ‘i he tapa kotoa pē ‘o e mo‘uí. ‘Oku taau ke malu‘i ‘a e fānau iikí mei he ngaahi fakaehaua faka‘ikonomika mo e ngaahi angahala kotoa pē.